故事時間：

第一個故事係咁

話說有一日喺U lib.溫緊neuro，有幾丁友研究緊佢地創業大計

企圖開補習社，但係，諗到工時唔長

最多開到15:00~21:00，於是有人問起「有咩朝早先做得？我地做埋，搵多d！」

點知有條友仔答「睇日出...」

頓時discussion room變返做lib.

呢個故事話俾我地知，有d人講野都幾有道理 @@!

第二個故事

話說有一日食完野，有兩個人見到有個女人，跑得何其難睇

之後有其中一個人話「佢食左屎呀？」

之後另一個人講左一句野，兩個人大笑

就係「食左屎唔係咁，佢應該賴左屎...」

呢個故事話俾我地知，有時醉翁之意不在走

我地係...中大宗教系

今日上堂時，有人輕聲問：「呢d咩嚟ga...?」

之後有人答：「係科學」

但係有另一個人回應：「我地已經脫離左科學」

跟住我話：「係宗教」

之後一齊回想成日有人同我地講

「你信就有ga la」或者「呢個重係未知嘅領域，答你唔到」

再抬頭望下「牧師」講書，完全好食過安眠藥

事實就此被肯定：我地入左宗教系，大概主修生化教吧...

今日去左知行煮幾味

首先有一味 "乜叉炒乜卵"

之後有個 "翼即係咁"

再上 "呀叉㩒住腸" 同埋 "蒸‧不銹 鋼蛋"

最後有一大煲 "娃娃菜天下"

好飽...

今日收到個2609字頭的電話, 腦入面出現一個問號

之後話係UC輔導處, 有多一個問號走左出黎

當我諗緊暑宿係咪有咩手尾未跟之時, 佢話

"你知唔知你有候補宿位啦?"

我當時諗, shit...唔係嘛, 唔會睇漏自己個名咁柒呀...

我答左一句 "唔知", 跟住佢話 "係呀~"

之後我醒一醒, 問 "個result幾時出ga?"

喝住佢話 "上個星期四~ 但係張紙寫錯左, 你唔係湯宿2xx, 應該係陳宿7xx"

我已經無理佢後面講咩, 我將自己個volume較高左兩格, 問多次 "個result你話幾時出話!?"

之後佢話 "上個星期四", 跟住我答佢 "咁依家唔駛啦..."

"咁即係點呀?講清楚d先, 係咪唔要個宿位?" "係!" "好, 拜拜"

呢件事的發生有兩個可能性

第一係呢個世界好多政府工, 理得人地死, 總之最後做得完件事就得

第二係唔知邊條茂里唔要個宿位唔出聲, 一個星期後輔導處搵佢, 再用一個星期搞候補

如果係呢點的話, 加埋今日同尋豪吹水的結果, 可以總結出

依家d大學生係攞正牌做一pat屎, 唔配叫做人

點解呢個年代d大學生遲到會無人覺得有問題

甩底完全唔出奇, 有手尾跟唔需要出聲

根本人越高位, 成團野就越會退化, 會串柒柒咁, 讀U又點

背完d死人past paper之後帶個影印機去寫晒d野落卷

呢團野真係有用? 學歷代表緊d咩? 個頭大, 塞草入腦塞得夠多呀?

的確, 唔考試分唔到人, 但係考完都唔見得有咩用

有種全部唔好讀書入去用腦, 睇下依家d大學生死淨得多個

BCH 4640 neuro lab report

今日本人第二次劏白老鼠, 隻小動物連埋尾有前臂咁長...

今次係睇腦, 所以我用左手食指逗住佢下巴, 右手拎把剪手起刀落咁cut佢個頭出黎

之後沿住僅餘的脊隨一剪拖上頭頂, 再爆開個頭殼拎個甲蟲樣的腦出黎

順帶一提, 個身喺枱面好緩慢咁流緊血

之後用刀片拖開隻甲蟲, 拎入面d野出黎

最後超額地解開埋佢胸襟, 發覺...

頂, 入面好無組織...... 個肝大得過火左d囉

條闌尾又成個胃咁樣, 個肺又有兩個葉... 想點呀~你老鼠

lab之後我地挑戰人體極限, 去med can食tea

梁出再度拎刀解雞翼, 尋豪食薯餅多茄汁, 我食腸粉多甜醬, 強勢!

諗返成個過程, 我有兩個感覺

第一係好有趣, 隻老鼠一開始時係打開8成眼

而過程中, 佢對眼慢慢合埋, 拎左個腦時閉上了......

第二係好恐怖, 好驚... 驚係驚唔知點解我落每一刀都無咩感覺

全程做左所謂最人道的事係問個demtor "隻野係咪真係死左?"

之後就當佢死物咁玩...... 好在我之後諗下如果呢隻係人我會唔會咁

如果唔係我真係可以以肢解狂為正職